എന്‍റെ നേരംപോക്കുകാര്‍!!

Monday, December 15, 2014

ഇതു താണ്ടാ പോലീസ്!

സഹമുറിയനൊപ്പം ജയനഗര്‍ ഫോര്‍ത്ത് ബ്ലോക്കിന്നു ചെറ്യേരു ഷോപ്പിങ്ങും കഴിഞ്ഞു തിരിച്ചു പോരാന്‍ നോക്കുമ്പോ ബൈക്ക് പാര്‍ക്ക്‌ ചെയ്തിടത്ത് കാണാനില്ല..
നല്ല ചെമന്ന നിറത്തില്‍ വെട്ടി തിളങ്ങുന്ന പുതുപുത്തന്‍ യമഹ എഫ്സി ബൈക്കാണ്.. ഓടിച്ചോണ്ട് പോകുമ്പോ അപ്രത്തുന്നും ഇപ്രത്തുന്നും ആളോള് കണ്ണ്‍ മിഴിച്ചു നോക്കണത് കാണുമ്പോ കുളിര് തരണ ബൈക്കാണ്! (ഓണര്‍ വേറെയാണേലും!)


സംഭവസ്ഥലത്ത് കൊച്ചു വര്‍ത്താനം പറഞ്ഞോണ്ടിരുന്ന രണ്ടു ഹിന്ദിക്കാരോട് കാര്യം ചോദിച്ചപ്പോ വണ്ടി പോലീസ് കൊണ്ടോയീന്നു അറിയാന്‍ പറ്റി.. വണ്ടി നിര്‍ത്തിയിട്ടതിന്‍റെ തൊട്ടുപുറകില്‍ കാട് പിടിച്ചു മൂടിയൊരു ബോര്‍ഡില്‍ ഞങ്ങള് വണ്ടി നിര്‍ത്തുന്നതിനും മുന്നേ ആരാണ്ട് 'No Parking' എന്നെഴുതി വച്ചതാണ് കാരണം!
ചുമ്മാ ഒരു രസത്തിനു ഫൈന്‍ എത്രയാകുംന്നു അന്വേഷിച്ചു വച്ചു.. കര്‍ണ്ണാടക റെജിസ്ട്രേഷന്‍ ആണേല്‍ വല്ല്യ സീനില്ല..
എന്താണേലും 300 മുതലങ്ങു കേറി 2000 വരേയൊക്കെ ആയേക്കുമെന്നു കേട്ടപ്പോ നെഞ്ചിന്നു ഒരു പെരുപ്പ്‌ കീഴോട്ടിറങ്ങി പെരുവിരലിലൂടെയങ്ങ് അന്തര്‍ധാനം ചെയ്തു! 


ഓടി പിടിച്ചു ജയനഗര്‍ പോലീസ് സ്റ്റേഷനില്‍ ചെന്ന് നോക്കിയപ്പോ സിനിമാ തിയേറ്ററിന്‍റെ പാര്‍ക്കിംഗ് ഏരിയായില്‍ പോയപോലെ.. സ്റ്റേഷന്‍റെ പരിസരത്ത് റോഡിനിരുവശത്തുമായി നിറഞ്ഞു കവിഞ്ഞ് കാറും ബൈക്കും നിരനിരയായി നിര്‍ത്തിയിട്ടേക്കുന്നു.. ഏതെടുത്താലും പത്ത്!!
നിരയില്‍ അങ്ങേയറ്റത്തായി നമ്മുടെ സുന്ദരന്‍ ബൈക്ക് പരിചയം കാട്ടി ഹാന്‍ഡില്‍ പതിയെ തിരിച്ചു ഹെഡ് ലൈറ്റ് മിന്നിച്ചു.. തൊട്ടടുത്ത് ഒരു നീല ഷര്‍ട്ടുകാരന്‍.. ഹിന്ദിയില്‍ പിറകിലൊരു ബോര്‍ഡ് ചൂണ്ടിക്കാട്ടി ഒരു പേപ്പറില്‍ ബില്ലും എഴുതി തന്നു സ്റ്റേഷനിലേക്ക് പൊക്കോളാന്‍ പറഞ്ഞു.. ബോര്‍ഡില്‍ വണ്ടി വലിച്ചു കൊണ്ടുപോകുന്ന നല്ല ഭംഗിയുള്ള പൈന്റിങ്ങും അതിനു താഴെ 200+100 മുന്നൂറു രൂപയാകുന്ന രേഖാചിത്രവും കൊടുത്തിട്ടുണ്ട്! കാശടക്കാന്‍ സഹമുറിയന്‍ കേറിപോയ നേരത്താണ് കരളലിയിപ്പിക്കുന്ന ആ കാഴ്ച!
ഒരു വലിയ ലോറിയില്‍ ഒരെട്ടു പത്തു ബൈക്കുകള്‍ കുത്തി നിറച്ചു കയറ്റി വന്നു സ്റ്റേഷന്‍ പരിസരത്തു ലോഡെറക്കുന്നു!
അടുത്ത ലോഡെടുക്കാനായി വീണ്ടും വണ്ടി തിരിക്കുന്നു!
മന്ദംമന്ദം കടന്നു പോകുന്ന ലോറിയുടെ 'കിളി' ഇരിക്കുന്നിടത്തിരുന്നു ഒരു ട്രാഫിക്‌ പോലീസുകാരന്‍ ലൌഡ് സ്പീക്കറിലൂടെ,
"ബംഗളൂരുവിലെ അപ്പികളെ! ട്രാഫിക്കില്‍ മൊട കാണിക്കണ എല്ലാ പയലുകളുടെം വണ്ടികളുടെ കാര്യങ്ങളും മറ്റും ഇതാ ഇതുപോലാകും.. സൂക്ഷിച്ചോളിന്‍!"
എന്ന് കന്നഡയില്‍ അനൌണ്‍സ് ചെയ്യുന്നുണ്ട്..
(കര്‍ണ്ണാടകയുടെ തിരോന്തരം ആണല്ലോ ബാംഗ്ലൂര്‍! അതാണ്‌ തര്‍ജ്ജമ ഇങ്ങനെ! )


ഫൈനടച്ചു വരുന്ന സഹമുറിയന്‍റെ കയ്യിന്നു രസീത് വാങ്ങി നോക്കിയപ്പോ അതില് പ്രിന്റിയിരിക്കണത് 200.. വാങ്ങിയത് 300!! 
പോലീസ് ഇവടേം അവടേം പോലീസ് തന്നെ..
ഇതുതാണ്ടാ പോലീസ്!!


എന്നാലും ആ 300 രൂപാ ഉണ്ടാര്‍ന്നേല്‍ പച്ചയില്‍ നീല വരകളുള്ള ആ ഞെരിപ്പന്‍ ടീഷര്‍ട്ടുകൂടി വാങ്ങായിരുന്നു! ഹും!" (ആത്മഗതം!)

2 comments:

  1. വരാനിരിക്കുന്നത് വഴീല്‍ തങ്ങൂല്ലല്ലോ!

    ReplyDelete
    Replies
    1. ഹി.. ഹി... അതെ അജിത്തെട്ടാ..
      വലുതെന്തോ വരാനുണ്ടായിരുന്നത് ഇങ്ങനങ്ങു തീര്‍ന്നൂന്ന് വിചാരിക്കാം...;)

      Delete